Et quant Butor ouï Bruiant ainsi parler,
Bien par dedans son cuer le prist a enamer,
Car il estoit hardis et moult fist a louer,
Et onques plus loyaus ne pot armes porter,
Et si avoit bon cors pour grant paine endurer.
On ne peüst plus fort en tournoy encontrer,
Car .j. cheval faissoit tourner et retourner
Si bien c’on n’i seüst nule rien amander.
Quant Bruians ot parlé, Butor fist commander
Que li mangers fust prest et qu’il vouloit disner,
Puis cria on aus cuex et fist l’iave corner,
Et quant on ot lavé, si s’asist au dingner,
Et puis ont commancié ménestrel a tromper,
Vïelles, estrument commancent a sonner ;
Chase un demenoit joie et vouloit demener
Pour Brun de la Montaigne en tous cas honnorer
Que Butor de sa char ot voulu engenrer
En la dame qu’il vot au moustier espousser
Qui tant de paine avoit eü a l’enfanter.
Quant chascuns fu assis, Butor fit comander
Que bien fussent servi li noble bacheler ;
Et il si furent il, nus n’i sot qu’amander.
Li devisse des mès seroit longue a conter,
Et si pourroie bien trop metre au devisser
Si que je m’en terai et n’en veil plus parler,
Car a autre matiére il me faut retorner.
Quant tuit orent disné on fist l’iave aporter
Et par devant Butor .iiij. bacins d’or cler,
Puis li tendi on l’iave et il prist a laver
Entre lui et Bruiant qui moult fist a loer.
- ↑ — 1801. amander, ms. quamander.
