« De dire le sien non n’irons pas resoignant,
« Mais amoureussement le vous dirons errant,
« Et si n’atend[e]rons jamais ne tant ne quant :
« [Ma] dame, il a un non vraiement si plaissant
« C’om n’en pourroit avoir nul meilleur ne plus grant :
« Il est apellés Bruns : est ce biau non d’enfant ?
« Nus hons ne vit plus bel en tretout son vivant. »
La dame dit : « J’en lo le dous Roy tout poissant,
« En qui tout crestïen sont fermement creant. »
Quant la dame ot l’enfant grant joie a demenée,
Pour l’amour de Butor, cilz nons bien li agrée ;
Mais pour voir ne savoit s’il avoit destinée,
Coment c’om li deïst qu’elle li fust donnée
Par dedans Bersillant en la forest ramée.
Si manda son seigneur a maingnie privée,
Et il i est venus sans nulle demourée :
En la chambre est entrés, de quoy la dame agrée,
Et quant la dame vit de lui fu saluée
De bonne voulenté trés bien ennamourée ;
Butor li a dit : « Dame, or ne soies irée :
« Vous avés delés vous vostre douce portée,
« La Royne des ciex en puist estre loée !
« Et par ma foy vés ci grascïeusse litée
« Qui lonc temps a esté de nous .ij. desirée.
« Dame, pleüst a Dieu que fussiés relevée,
« Et que vos [filz] eüst toute enfance passée,
« Et si fust maintenant en la .xije. année :
« Chevalier le feroie ainz demain l’avesprée,
« Et si li sainderoie au costé une espée.
— Sire, » ce dit la dame, « et de la destinée
« C’ou bois de Bersillant a esté devissée,
« Je vous en pri pour Dieu qu’elle me soit contée.
- ↑ — 1511. joie, ms. joue. — 1521. iriée.
