A l’arbre vindrent tost les dames gracïeusses
Qui trés parfaitement estoient amoureusses,
Qui de toute bonté estoient vertueusses,
En bien et en honnour et en sens plentureusses,
Et de bien faire adès estoient desireusses,
Et des visces fuïr estoient couvoiteusses,
Et en deduit mener estoient gaieteusses,
Et de biaus dons donner estoient mult soigneusses.
Et quant li chevalier les virent si jouieusses,
Et en toute honnesté parfaitement soigneusses,
Il dirent en leu[r]s cuers : « Elles sont gracieuses,
« Et s’apert vraiement qu’elles sont amoureuses. »
Les dames dont je di si estoient faées
Qui si trés noblement estoient asesmées.
Leur cors furent plus blanc que n’est noif sor gelée.
Et si trés chiérement estoient atournées,
Car de couronnes d’or furent toutes dorées
Et de blans dras de soie estoient aournées ;
Enmi de la poitrine estoient escollées.
Se uns hom eüst erré .ij. .c. mile journées
Ne fussent point par li trois plus belles trouvées,
Et s’eüst conversé en cent mile contrées.
Et quant des chevaliers furent bien avissées,
Leur courage mua et toute[s] leur pensées,
A celle fin que d’eus furent moult desirées
Pour la biauté de quoy elles furent parées.
- ↑ — 930. h. en e.
