Si trouva a la porte .j. cortois damoissel,
Qui sur son poing tenoit .j. gracieus oissel.
Au messagier a dit : « Sés tu rien de nouvel ?
« Veïs tu monseigneur, la vers cel arbrecel ?
— Ouïl, sire, » dist il, « il est en grant revel,
« De ce que j’ay esté en l’ille de Bourdel,
« Car il a tout mandé, et viel et jouvencel
« Le veignent conseiller par dedans son chastel,
« Car il fera porter son enfant au ruissel.
« Ainsi l’a il juré, et par saint Danïel
« Il n’est nus qui li puist oster de son cervel,
« Et si li deüst on froissier d’un grant martel.
— Amis, » dit li vassaus, « de si noble jouel
« Comme est li filz Butor ne donroie .j. annel :
« Il en sera marris ainz qu’il voie Noel. »
Quant li mesage fu au perron descendu[s]
Il entra en la porte et ou palais lassus ;
Tout droit en la cuissine est tout errant venus.
Si tost qu’il vit les queux pas ne fu esperdus,
Mais leur dist : « Li diners est il tous pourveüs ? »
Quant l’oïrent li queux chascun fu esmeüs,
Et dirent : « Que t’en chaut ? nos saussiers est perdus. »
Li mesagiers respont : « Si soiez vous pendus !
« Ja de vous en avra grant plenté de batus,
« Car vesci monseigneur ou il est descendus. »
Quant li queus ont oy le mesagier parler,
Il ont fait tout errant les tables aprester,
Les napes furent tost misses sans cesser,
Et Butor entra ens et tuit li bacheler.
- ↑ — 406. Corr. arester ?
