Lui et .xx. chevaliers qui estoient si dru,
Qui estoient trestout d’unes robes vestu.
Si tost que li varlès a veü l’asemblée,
Il a point le cheval par telle randonnée,
Que li chevaus s’en va comme beste dervée
Si qu’il ne fist c’un saut a l’issir de la prée.
Mais de tout l’os avoit la char si entamée
Des esperons qu’il ot sentu celle jornée,
Que il sembloit qu’il fust arousés de rousée.
Si estoit il mouilliez d’iave qu’il ot suée,
La pel avoit plus rouge et plus ensenglantée
Que [sont] mains de bouchier quant la char est tuée.
Tant ala li varlès qu’ains qu’il fust l’avesprée
Qu’il a trouvé Butor et sa gent honnorée ;
Et quant Butor le vit s’a grant joie menée,
Et li a dit : « Amis, ta venue m’agrée, »
« Que dient mi baron ? Il est eure passée
« Qu’il deüssent venir en ma sale pauvée. »
Li varlès descendi, qu’il n’i fist demourée,
Et a dit a Butor : « S’il ne vos desagrée
« Ja vous sera par moy la nouvele contée.
« J’ai trouvé de vo gent cent en une assemblée,
« Par moy leur a esté la chose revelée,
« Et leur ai dit que puis que la mer fu creé[e],
« Ne fu de dame faite ausi noble portée,
« Que celle [dame] a fait qui est vostre espousée,
« Et c’uns fiex en est nez, ou proesce ert trouvée,
« Et que vos plesirs est avecques vo pensée
« Que cilz filz soit portés ou il a mainte fée.
« Et il m’ont respondu, de quoy pas ne m’agrée :
« Que scïance est en vous plainement radotée,
- ↑ — 267. Corr. M. desc’a ?