Et si li a dit : « Bruns, .ij. mos a moy parlés.
— Dame, » respondi Bruns, « tout a vos voulentés. »
Adonques se leva, s’est a la dame alés.
La dame li [a] dit : « Brun, or ne mentés mie :
« Je sui toute certaine, en tant qu’a vo partie,
« Qu’il ne tient pas en vous que vous n’aiés amie :
« Dont certeine je sui que n’est pas esloignie
« Que ne soit assés près de ceste compaignie. »
Et quant Brun l’entendi, sa face en est rougie :
Et li a respondu, a vois basse et serie :
« Dame, je ne connois point l’amoureusse vie
« Qui est et belle et gente, amoureuse et jolie ;
« Si que lessiés m’ester, li miens cuers vous en prie,
« Car ce que mes cuers sent li vostres ne sent mie.
« Louée en soit amours qui m’a de sa maisnie
« Quant je sui de ses gens et de moi est servie.
« Quant li plaira, mercis sera de moy baillie. »
Si tost que Bruns ot dit la dame son vouloir,
La dame a regardé du Muable manoir.
Quant la dame le vit, lés lui s’ala s[e]oir ;
Par le semblant de Brun puet bien aparcevoir
Qu’il estoit vrais amans, et non amés, por voir ;
Si li dit : « Bruns amis, je puis assés savoir
« .I. pou de vo secré ; bien vous pourrai valoir :
« S’a moi vous en voulés .j. petit esmouvoir,
« Avant qu’il soit demain vous pourrés percevoir.
— Dame, » respondi Bruns, « amour me fait doloir
« Par [la] seue merci pour le plus bel avoir
« C’onques veïst nus hom, ce povés bien savoir. »
