« Mais je vous pri, pour Dieu qui ot son corps pené,
« Que vous resoiés ci dedans la Trinité.
— Sire, » ce li dit Bruns, « de ce pas ne me tient :
« S’on set bien ou on va, on ne set quant on vient ;
« Mais soiés tout certains que quant il me souvient
« De ce qu’ai en pensé, mes cuidiers vient a nient,
« Car je sui plus pensis qu’a moy il n’apartient,
« Car j’ai dedens mon cuer chose qui me soustient :
« C’est pensée amoureuse, et ne sai dont ce vient,
« Ne je ne sai comment nulz cuers d’amer s’atient
« Qu’il ne fait en amant tout ce qu’il apartient.
- CLXXIII
— Biax filz, » ce dit Butor, « vous avés vo pensé
« D’aler aventurer en estrange contrée.
« Quel part ert vos chemins et vo voie tournée ?
— Sire, » respondi Bruns, « ma voie ert ordenée
« Ainsi que l’aventure ert de moy encontrée ;
« Mais ge chevaucherai par la forest ramée
« Tant que de moy sera aventure trouvée ;
« Car je devieng amans, si veil trouver amée,
« Car puis que l’aventure est a moy destinée
« Jamais ne cesseray si sera achevée.
« Sachiez si mouverai en iceste jornée ;
« Or faites que ma chose soit errant aprestée
« Si que ma voie soit errant acheminée.
« Mais ma dame sera ains de moy acolée,
« Si qu’il li souvendra a toudis de m’alée. »
Quant la dame l’oy, s’est cheüe paumée,
Et Bruns de la Montaigne errant l’a relevée,
Et ses péres ausi, a cui moult bien agrée ;
