Quant Bruns de la Montaigne ot veü le meschiés
Que sa mére sentoit pour lui, moult fu iriés :
Si pensa que c’estoit moult grant mortés pechiés ;
Si a dit a Butor : « Sire, or me conseillés,
« Car il faut tout errant que soie apareilliés ;
« Et si vous pri pour Dieu c’un cheval me bailliés
« Qui soit bien ensellés et trés bien aaissiés,
« Car avant m’en iray que jors soit anuitiés.
« Or veille Diex que bien puisse estre herbergiés.
— Biax filz, » ce dit Butor, « tu es mal enseigniés,
« Car jamais ne serai jor de ma vie liés ;
« Je vouroie estre mors ou du tout mehaingniés
« Quant tu es pour si pou ainsi a moy courciés. »
Et Bruns li respondi : « Sire, pour voir sachiés
« Que je perderai trop se plus me detriiés,
« Car li temps est venus que doi estre avanciés,
« Si que par vous ne puet mes cuers estre changiés. »
Quant Butor a veü que Bruns el n’en fera,
Pour pére ne pour mére il ne s’arestera,
La dame a apellée, a .j. lés l’enmena,
Et li dit bellement : « M ’amie, il convenra
« Que Brun de la Montaigne ait, quant il s’en ira,
« .III. des meilleurs chevaus que ceans trouvera ;
« Car sachiés pour certain qu’au jour d’ui istera
« Du chastel de ceans, et ne retournera
« Si avra achevé tout le veu que fait a. »
Quant la dame l’oy, de rechief se pauma ;
Butor de la Montaingne adonc l’en releva.
- ↑ — 2979. adonques.
