Ce fu canqu’il y ot fors la feste greignour
Que Butor avoit fait c’om clamoit le seignour.
Quant ce vint l’andemain et prime fu sonnée,
Que Butor se gissoit par delés s’espousée,
Il li dit : « Belle suer, vous estes relevée.
« De quoy j’en graci Dieu et la Vierge honnorée,
« Quant a son dous plaissir vous estes relevée.
« J’ai planté de ma gent en iceste contrée
« Que j’ai pour vostre amour en pluseurs lieus mandée ;
« Or sui je tout certains que pas ne leur agrée,
« Car puis qu’il est ainsi que la feste est passée
« Il ne leur plaira mais la longue demourée.
« Dame, si vous requier, se vos plaissirs l’agrée,
« Que je donne congiet a ma gent honorée,
« Qui pour moy a esté travaillie et penée. »
La dame respondi com dame bien senée :
« Sire, quant vous avés vo gent ci assemblée,
« Et que du haut païs l’avés ci aünée,
« Ce sera grant meschiés s’il n’on[t] bonne soudée,
« Car il n’avront jamais la perte recouvrée
« Qu’il ont eü pour vous, espoir, en ceste année. »
Et le cuer amoureus, courtoys, joli et gay,
Butor li respondi : « Ma dame, je donray
« Bruiant d’Ynde majour .iiij. destriers que j’ai
« En restor du grant grief qu’en joustant fait li ay,
« Et l’autre chevalier qu’après luy encontray,
« C’est cilz qui a le pris, je li restoreray
« Le cheval qui fu mors que desous lui tuay,