A leur habit sembloit que ce fussent .ij. fées.
Moult doucement les a li hyraus apellées ;
Si leur dir par amour : « Or soiés aprestées,
« Car par vous .ij. seront les honneurs presantées
« Pour quoy les lances ont hui esté si froissiées
« Et cheval abatu, espaules espaulées,
« Mains hïaumes hostés, frapé maintes colées. »
Quant les .ij. dames ont le hyraut escouté,
Moult doucement li ont enquis et demandé
Pourquoy il les avoit toutes .ij. apellé.
Il leur a respondu par moult grant amisté :
« Mes dames, il couvrent que vous aiez porté
« Le pris au chevalier a qui je l’ai donné,
« Car il l’a deservi, et par ma loiauté ;
« Mais il faura avant que vous aiés tourné
« .IIII. tours tout entour le gracïeus barné,
« Tant que vous l’aiés [bien] connut et avissé,
« Par quoy vous [le puissiez] si avoir asené
« Qu’il ne puist estre a vous ni a moy reprouvé. »
Les dames li ont dit : « Faites vo voulenté.
— Dame[s], » dit li hiraus, « par vostre asentement
« Vourai donner le pris selonc m’entendement,
« Mais vous le porterés et s’en ferés present
« Au chevalier qui l’a deservi vraiement ;
« Et vous le savrés bien faire courtoissement,
« Et je le vous requier trés amoureussement. »
Les dames li ont dit : « Or nous dites comment
« Li pris sera donnés tretout premiérement.
— Dame[s], » dit li hiraus, « par vo consentement,