nachos exercititio est chorus. Cantu si quidem mirè moventur musculi oris, partiumque adjacentium, & ob frequentem quam subeunt hæ partes contractionem, liquorum transcolatio, expressio, & circuitus faciliùs absolvuntur ; deincepsque liquida omnia vel remotissima celeriùs ad motum cientur. Quin & librorum lectio quæ altiori voce fit, & omnis loquela paululùm elata, inter optima exercitationum genera recenseri debet. Voce agitantur spiritus non leviter, nec in superficie corporis, ut frictione fit quæ tamen sanitati tuendæ adeò confert[1], sed velut in ipso fronte, in ipsis visceribus : id cauæ est cur Monachi conclusi & claustrales Virgines, quamvis non multo uti videantur exercitio, vitam tamen salubrem ducunt, diu scilicet noctuque vocem exercentes in canendis Deo precibus, hoc vocis exercitio corporis motum pensantes. Certè spiritus à voce impulsi, nervorum, fibrillarumque tubulos faciliùs subeunt, & aër ab organorum vocalium impulsu commotus, ferit & spirituum & humorum & membranarum systema ; hinc debita in humoribus fermentatio & exaltatio ; hinc fluiditatis conservatio, & transpirationis promotio, quæ omnia remediorum diaphoreticorum ope obtineri nequidem possunt.
- ↑ Georgius Bagliv. Joseph Quercet.
