Romæ, apud sanctum Petrum, sub annulo piscatoris, die xxiij julii m. d. lxxx, Pontificatùs nostri anno nono. Ant. Buccapadulius.
(Copié sur l’original, en vélin.)
Jehan De Lesselie, par la grâce de Dieu, Evesque de Rosse, suffiragant de l’archevesché de Rouen, le siége vacant, subdélégué de l’illustrissime cardinal de Plaisance légat envoyé en France par nostre sainct Père le pape Clément huictième et du sainct siége apostolique. A tous ceux qui ces présentes verront, salut et dilection. Sçavoir faisons que, ce jourdhuy dabte des présentes, au palais archiépiscopal du dict Rouen, s’est présenté par devant nous noble homme Claude Péhu sieur de la Motte en Picardie, parroisse de Longueuil ; le quel, aprèz avoir faict profession de la foy et religion catholique, apostolique et romaine, en la quelle il nous a dict et juré avoir tousiours persévéré jusques à présent, a déclaré et confessé qu’il avoit esté pris prisonnier par un nommé Vignault maistre de camp, lors que la ville de Gournay fut prise par ceulx du party contraire, estant dans la dicte ville, pour la deffense d’icelle, et que, par le moyen du sieur d’Allaigre, du quel il avoit esté page, il avoit esté délivré, ayant payé pour luy deux cens escus de rançon ; pour raison de quoy, puys sa dicte délivrance, il s’estoyt retiré avec luy, l’ayant tousiours assisté et porté les armes soubz luy pour le party du roy de Navarre, allencontre des catholiques ; en quoy faisant il avoit encouru l’excommunication et censures de l’église, demandant, en toute humilité pardon à Dieu et à la dicte église, et de nous l’absolution, soy submettant à telle pénitence que adviserons bien estre, avec protestation de n’adhérer jamays au dict roy de Navarre, ses fauteurs et adhérens, ne porter les armes, ny favoriser en façon quelconque les hérétiques, ains vivre en l’union de l’église catholique apostolique et romaine, et mourir pour la deffense d’icelle. Veu les quelles profession, confession et protestations, après lui avoir enjoinct nénitence salutaire, luy avons donné le bénéfice d’absolution, ayant icelluy Péhu juré sur les sainctes évangiles et signé en présence du, notaire et secrétaire soubzsigné, le 26 de may 1593 ; présens à ce honnorable homme Gilles Dufossey, greffier du siége présidial de bailliage de Rouen, et Henry Lefebvre sergent royal au dict Rouen.
