Rire en plorant, et très amerement
De triste cuer chanter joyeusement.
Aucunes gens ne me finent de dire
Pour quoy je suis si malencolieuse,
Et plus chanter ne me voient ne rire,
Mais plus simple qu’une religieuse
Qui estre sueil si gaye et si joyeuse ;
Mais a bon droit se je ne chante mais,
Car trop grief dueil est en mon cuer remais.
Et tant à fait Fortune, Dieu lui mire !
Qu’elle a changié en vie doloreuse
Mes jeux, mes ris, et ce m’a fait eslire,
Dueil pour soulas, et vie trop greveuse ;
Si ay raison d’estre morne et songeuse,
Ne n’ay espoir que j’aye mieulx jamais.
Car trop grief dueil est en mon cuer remais.
Merveilles n’est se ma leesce empire ;
Car en moy n’a pensée gracieuse,
N’autre plaisir qui a joye me tire ;
Pour ce me tient rude et maugracieuse
Le desplaisir de ma vie anuieuse.
Et se je suis triste, je n’en puis mais,
Car trop grief dueil est en mon cuer remais.
