Qui rens par ton pur sang nos pechez nettoyez,
Et qui feras lever mon corps de pourriture,
Entens mes tristes cris jusqu’au ciel envoyez,
Et prens pitié de moy, qui suis ta creature.
Exauce, exauce, ô Dieu ! ma priere enflammée !
Destourne loin de moy ta colere allumée,
Fay porter mon esprit par un doux jugement
Dans le sein d’Abraham, avec tous les fidelles,
Afin que ton sainct nom je chante incessamment,
Jouïssant bien-heureux des clairtez eternelles.
PARAPHRASE
SUR LE CANTIQUE DES TROIS ENFANS. DANIEL, III.
Benedicite omnia opera Domini. etc.
Ô vous ! du Seigneur les ouvrages,
Clairs miroirs, vivantes images,
Qui par tout son art faites voir,
Effets que de rien il fist estre,
Tous, tous, benissez vostre maistre,
Louez et haussez son pouvoir.
Anges, ses ministres fidelles,
Purs esprits, lumieres tres belles,
Cieux si reglement mesurez,
Humeur en crystal congelée
Plus haut que la vouste estoilée,
Le seigneur, sans fin, reverez.
Vertus, dont l’heureuse influence
Aux elemens donne puissance,
Estoiles, fleurs du firmament,
Œil du jour, œil de la nuict brune,
Soleil ardant, humide lune,
Loüez le Seigneur hautement.
Benissez-le, pluye et rosée.
Confort de la terre embrasée,
Vents legers, esprits agitez,
Feu, dont la nature est si vive,
Hiver pesant, chaleur active,
Sur tout le Seigneur exaltez.
Frimas et bruine menuë,
Flocons blancs tombans de la nuë,
Gelée et glaçons condensez,
Jours et nuicts, terrestres ombrages,
