Le texte de cette page a été corrigé et est conforme au fac-similé.
PRIERES
ET
AUTRES ŒUVRES CHRESTIENNES
______
PLAINTE DE L’AUTHEUR
DURANT UNE SIENNE LONGUE MALADIE.
Ma chair comme eau s’est escoulée,
Et ma peau defaicte est colée
Sur mes os pourris par dedans ;
Tout mon bien est mort en une heure,
Et rien de moy ne me demeure
Que la levre aupres de mes dens.
Mes yeux ont tari leurs fontaines,
Mes nuits d’amertume sont pleines,
Mes jours sont horribles d’effroy ;
Le sommeil jamais ne me touche,
Et la puanteur de ma bouche
Fait que j’ay mesme horreur de moy.
Ayez de pitié l’ame atteinte,
Au moins vous qui m’aimez sans feinte,
Et me pleurez amerement :
La main du Seigneur courroucée
S’est en fureur sur moy poussée,
Et me presse ainsi rudement.
Je soupire avant que je mange,
Et mon gemissement estrange
Bruit comme un torrent retenu ;
