Orpheus hinc ieras alter, testudine mulcens
Cyaneæ cautis sibi concurrentia saxa :
Teque lyram pulsante tuus novus alter Iason
Henricus rediit, glaciali sospes ab Arcto,
Magna viæ referens sibi præmia parta suisque,
Ipse duplex regnum, duplicem sua turba favorem.
Hos inter primum tibi Musa fidelis honorem
Jure dedit, sibi quem non æmulus occupet alter.
Macte igitur fide tu Lyrica, Portæ, fideque
Macte piæ mentis candore et simplice sensu,
Qui semel admissos non fallere novit amicos.
Praxitelem memorant qualem sit passus amorem
Depinxisse, nec hac celebratior ulla tabella
Quam sibi quæ affectum domini præferret amantis ;
Forsan et exemplar, quem tu describis, amoris
Sumptus es ipse tibi : sic et non improbus ille,
Et pius, et formæ tantum mirator honestæ,
Qualis erat dum parvus erat simplexque Cupido,
Nullaque purus adhuc nisi forte sororia libans
Oscula, et innocuas jaculans sine vulnere flammas,
In vultu mentis contemplabatur honores.
PHIILIPPUS PORTÆUS — PUPPI TALIS ORPHEUS
Cyaneos fluctus dum prima carina secaret,
Heroas revehens Æmoniumque ducem,
Et concurrentum scopulorum angusta, vel ipsum
Terrerent Tiphyn, ne peritura foret,