Entre tant de milliers son coup malicieux
A bien sceu remarquer ce chef-d’œuvre des cieux,
Et ravir tout l’honneur de ce monde où nous sommes.
Ce qu’est l’herbe à la terre, à l’herbage les fleurs,
L’or aux autres metaux, la blancheur aux couleurs,
Cher amy, tu l’estois à la race des hommes.
DU LATIN DE M. DE PIMPONT
Ô le plus doux soucy jadis de ma pensée !
Maintenant le regret dont elle est si pressée,
Qui, sans moy, trop cruel, es party de ce lieu,
Damon, je te saluë, et si te dis adieu ;
Je t’espan de mes yeux ces offrandes funebres,
Mes yeux ores couverts d’éternelles tenebres ;
Je t’offre ces cheveux sur ta tombe semez,
Presens de toy, mon cœur, autrefois tant aimez !
Voy comme un double amour un double autel se dresse,
Voy de quels desespoirs j’entretiens ma tristesse !
Et que la cendre, helas ! qui reste icy de toy,
Sente en beuvant mes pleurs, mon office et ma foy.
Nostre amour plein de feu passe aux nuicts éternelles,
Il traverse le Styx en ramant de ses ailes,
Par tout il t’accompagne et te veut ramener,
Mais en vain, car jamais tu n’en peux retourner.
Au moins donne-toy garde, ô seul bien de ma vie,
Que des eaux de Lethé ne prennes quelque envie !
Retien de nos desirs la memoire à jamais,
Ainsi que saintement du cœur je te promets
Que la course des ans, la mort, l’onde et la flame
N’effaceront jamais ton portrait de mon ame.
I
Pourquoy, contre mon gré, ce corps est-il si fort
Que ma juste douleur ne le puisse desfaire ?
Qui retient tant mon ame en ce lieu de misere,
Sans revoler au ciel où gist tout son confort ?
Las ! tout ainsi qu’Amour avec un seul effort
Traversa nos deux cœurs et n’en fist qu’un ulcere,
Pourquoy le ciel jaloux, envieux et contraire
N’a-t-il finy nos jours par une seule mort ?
La femme d’Amphion, justement affligée,
Par son dueil excessif en rocher fut changée,
Qui ses enfans meurtris semble encore pleurer.
Que je serois heureuse ayant telle advanture !
