Car, si l’Amour est dieu, c’est un dieu d’injustice,
Un enfant, un aveugle, un tyran inhumain,
Qui porte au lieu de sceptre un flambeau dans la main,
Dont il brûle les cœurs de flammes éternelles,
Et tourmente plus fort ceux qui sont plus fidelles.
De ce meschant Amour, injuste et rigoureux,
Quatre amans estrangers, courtois et genereux,
Ont fait (à leur malheur !) beaucoup d’experiences,
Et tiré des rigueurs pour toutes recompenses.
Apres avoir long tans fidellement aimé,
Nourrissans dans le cœur un brasier allumé ;
Apres avoir passé les plus cruels allarmes,
Et de sang et de pleurs souvent baigné leurs armes ;
Apres avoir souffert, servy, pleuré, prié,
Et n’avoir leur esprit qu’en un lieu dedié,
Lors qu’ils pensoient cueillir le doux fruit de leurs paines,
Ont receu pour tout bien des esperances vaines,
Des propos incertains, des refus, des longueurs,
Qui gesnent leurs esprits d’éternelles langueurs,
Et qui les font mourir en cruelle souffrance,
Pitoyable loyer de leur obeïssance.
Or bien que ces guerriers, si durement traitez,
Peussent estre à bon droit contre Amour despitez,
Et blasphemer ses traits, son pouvoir et sa flame,
Chacun d’eux en mourant honore tant sa dame,
Qu’il invoque son nom au milieu du tourment,
Et reçoit son trespas comme un doux payement ;
Voire et sont eschauffez d’ames si genereuses,
Qu’ils veulent maintenir leurs douleurs amoureuses,
Passer toutes douceurs, et qu’ils sont plus heureux
Que les plus jouyssans et contans amoureux.
Or donc, si quelque amant chery de sa maistresse
A desir d’essayer au combat leur addresse,
Au hazard de sa vie il la peut esprouver,
S’il veut tout aussi-tost en armes se trouver,
Soit pour courre une bague et pour donner carriere,
Ou rompre à camp ouvert une lance guerriere,
Donner six coups d’espée, et soudain faire voir
Au combat de la pique un amoureux devoir,
Car ils s’asseurent tant en leur juste querelle,
Qu’ils esperent l’honneur d’entreprise si belle.
