Ma foy me rend trop ferme aux assauts du malheur,
Et ne me veut souffrir d’alleger ma douleur,
Encor que justement je le peusse bien faire,
Puis qu’à mon plus grand heur elle est toute contraire.
Amour, d’autre costé, sans égard à ma foy,
Foule aux pieds ma franchise et triomphe de moy,
Laissant vive en mon ame une immortelle braise ;
Et ma foy toutesfois ne veut que je l’appaise,
Mais plutost que je meure, et qu’en cette verdeur
Mon cœur serve d’hostie à l’amoureuse ardeur.
Et la fortune encor, sans raison mutinée,
Rends, las ! plus que ces deux ma vie infortunée ;
Car c’est par sa rigueur que je me vois priver
Des fleurs de mon printans par un facheux hyver.
Las ! c’est par sa rigueur que je languy captive,
Et me voy jeune et belle enterrer toute vive.
Ô cieux fiers et cruels ! ay-je donc merité,
Durant mes plus beaux jours, telle captivité ?
Que n’avez-vous plustost, si j’avoy fait offence,
Mis en poudre mon cœur pour plus douce vengeance ?
Helas ! que j’eusse eu d’heur, si le cruel flambeau
Qui brûloit à ma nopce eust orné mon tombeau,
Finissant tant de morts, dont il faut que je meure !
Toutesfois en souffrant cet espoir me demeure
Que la mort, que j’attens, m’ouvrira quelque jour
Les prisons de la Foy, de Fortune et d’Amour.
XLI
Quoy que fasse le ciel, je seray tousjours telle,
On perd tans d’essayer à forcer mon vouloir ;
Tous les assauts des vens contre un roc n’ont pouvoir,
Ma foy, c’est un rocher qui jamais ne chancelle.
J’ay juré saintement d’estre tousjours fidelle
Sous l’empire d’Amour ; je luy veux faire voir
Que je puy pour ma foy mille morts recevoir,
Car mourir pour sa foy c’est une chose belle.
Les faveurs, la grandeur, les biens, l’esloignement,
La rigueur des parens ; leur courroux vehement
De ce ferme vouloir ne me peuvent distraire.
L’or s’affine au fourneau, mon ame en est ainsy :
Elle s’affine au feu d’ennuis et de soucy,
Et paroist aux malheurs plus constante et plus claire.
