Ce dit, en se levant de fureur transporté,
Se saisit du poignard qu’il portoit au costé,
Le baise en soupirant, puis, d’ardeur violante,
Au creux de l’estomach jusqu’aux gardes le plante ;
Le retire aussi-tost rouge, escumeux et chaud,
Puis se laisse tomber, les yeux levez en haut.
Le sang va contremont d’une force soudaine,
Comme on voit quelquesfois les eaux d’une fontaine
Rejaillir en bruyant, d’un cours haut élancé,
Par le petit pertuis d’un grand tuyau percé.
Le messager y court, qui voit comme il sanglote,
Qu’il a les yeux mourans et que son ame flote
Sur une mer de sang, qui ne veut s’estancher ;
Alors en haletant tache à le dessecher.
Le roy, qui le connoist, vers luy dresse la face :
« Dy comme tu m’as veu, » (dit-il d’une voix basse),
Et, voulant achever, un sanglot il tira,
Et son esprit en l’air comme vent soupira.
Le ciel commençait fort d’obscurcir son visage,
La clarté peu à peu faisoit place à l’ombrage,
Et desjà dans le bois rien plus ne se voyoit
Qu’un grand voile obscurcy, qui les cœurs effroyoit.
Parquoy le messager, qui sent son ame attainte,
Ne voulant demeurer toute la nuit en crainte
Aupres de ce corps mort, en pleurant le laissa,
Et pour gaigner logis autre part s’adressa.
Son cœur est tout serré d’un fait si pitoyable,
Il doute si c’est songe ou chose veritable ;
Et luy tarde beaucoup qu’il ne trouve où loger,
Pour, faisant ce recit, son esprit alleger.
Tant que la nuit dura, les nymphes des fontaines,
Celles des clairs ruisseaux, celles qui sont aux plaines
Et dans les bois sacrez, toutes grosses d’ennuy,
Pleurerent Sacripant et firent dueil sur luy.
Honorant à l’envy son obseque derniere,
L’une arrosoit sa playe avec eau de riviere,
L’autre essuyoit le sang, l’autre, qui soupiroit,
La paupiere des yeux doucement luy serroit ;
L’autre tenoit sa teste en son giron couchée,
L’autre amassoit des fleurs et en faisoit jonchée,
L’autre en plaignant sa mort la rigueur maudissoit,
Et quelqu’une à l’écart l’œil au ciel addressoit,
Faisant priere ainsi : « Pere de toutes choses,
Qui as fait, qui maintiens, qui conduis, qui disposes,
Qui juges droitement, et qui, plein d’équité,
Sou-guignes les ingrats d’un œil tout despité,
Page:Œuvres de Philippe Desportes (éd. 1858).djvu/458
Le texte de cette page a été corrigé et est conforme au fac-similé.
![](http://upload.wikimedia.org/wikipedia/commons/thumb/f/f7/%C5%92uvres_de_Philippe_Desportes_%28%C3%A9d._1858%29.djvu/page458-1024px-%C5%92uvres_de_Philippe_Desportes_%28%C3%A9d._1858%29.djvu.jpg)