Le texte de cette page a été corrigé et est conforme au fac-similé.
ANGELIQUE
CONTINUATION DU SUJET DE L’ARIOSTE
_______
À MONSEIGNEUR LE DUC D’ANJOU
DEPUIS ROY DE FRANCE ET DE POLOGNE
_______
LIVRE PREMIER
_____
Je chante une beauté des beautez la premiere,
Le paradis des yeux et la vive lumiere,
Qui comme un clair soleil icy-bas s’espandoit,
Du tans que Charlemagne aux François commandoit ;
Celle qui receloit des attraits pour surprendre
Les braves, qui pensoient contre Amour se deffendre,
Qui surmonta Renaud, Ferragut et Roland ;
Mais, sans aucun soucy de leur mal violant,
Ni de tant de combats qu’ils avoient eus pour elle,
Se fist tousjours connoistre aussi fiere que belle.
Race des dieux de France, honneur de l’univers,
Mon prince, mon seigneur, le support de mes vers,
Laissez un peu la charge où vostre esprit s’applique,
Pour ouyr les regrets de la belle Angelique,
