Page:Œuvres de Philippe Desportes (éd. 1858).djvu/412

Voit de ses coups divers sonder la profondeur,
Et pour le secourir met au loin sa grandeur.
Qu’on ne me vante plus l’amitié vengeresse
Du preux fils de Thetis, seur rampart de la Grece,
Ni le feu saint et beau dont Pylade est forcé,
Quand il s’offre à mourir pour Oreste insensé !
S’esteigne le renom d’Hercule et de Thesée,
Et de ceux dont la gloire en tout age est prisée,
Qui se sont de mortels dans le ciel elevez,
Pour les droits d’amitié saintement observez !
Mon prince, le plus grand de cette terre basse,
Comme en toutes vertus en cecy les surpasse :
Nul divertissement sa douleur ne deçoit,
Des yeux ny de l’esprit le somme il ne reçoit,
Tant cet ennuy le point ; donne, promet et prie,
N’estime rien trop cher pour racheter sa vie ;
D’autour de son chevet il ne se peut bouger,
Et de sa blanche main le fait boire et manger ;
Importune le ciel de vœux et de prieres ;
Bref, pour flechir la mort tente mille manieres.
Mais ceste fiere Parque, aux ravissantes mains,
Seule des deïtez est sourde aux cris humains ;
Sans pitié d’heure en heure elle abat sa jeunesse,
Et d’un si beau sejour se veut faire maistresse.
Amour, qui s’y logeoit superbe et redouté,
Luy resista long-tans d’un courage indonté ;
Et durant qu’il demeure un seul trait en sa trousse,
Tousjours brave et vaillant, arriere il la repousse.
En fin il est contraint, foible et tout desarmé,
De quitter en pleurant un logis tant aimé,
Deconfit, esperdu, traisnant l’aile blessée,
Comme un qui s’est sauvé d’une place forcée.
Or quelque peu devant que l’extreme accident
Couvrist ce point du jour d’eternel occident,
Durant qu’autour du lict maint grand soupir resonne,
Et que Cleophon mesme aux regrets s’abandonne,
Damon, le regardant, son esprit renforça,
Et ces derniers propos avec l’ame il poussa :
Prince, honneur de nostre age et sa gloire premiere,
Qui fus mon heur, mon tout, mon ame et ma lumiere,
Et le seras tousjours (car malgré son effort,
L’amitié cette fois surmontera la mort),
J’estime heureusement ma carriere achevée,
Ayant jusqu’au tombeau ton amour esprouvée,
Et remporte en mourant un eternel plaisir
D’avoir si dignement sceu loger mon desir.