Je t’accuse, Nature, et me plains justement ;
Car puis qu’il me devoit porter tant de nuisance,
Attizant en mon cœur un feu si vehement,
Que n’as-tu pour mon bien retardé sa naissance ?
Toutesfois si nostre âge, heureux par sa presence,
Ne pouvoit sans mon mal voir ses yeux clairement,
Je pren tout consolé ma mort en patience :
Qui meurt pour le public meurt honorablement[1].
XX
Quand quelquesfois je pense à ma premiere vie,
Du tans que je vivois seul roy de mon desir,
Et que mon ame libre erroit à son plaisir,
Franche d’espoir, de crainte et d’amoureuse envie.
Je verse de mes yeux une angoisseuse pluye,
Et sens qu’un fier regret mon esprit vient saisir,
Maudissant le destin qui m’a fait vous choisir,
Pour rendre à tant d’ennuis ma pauvre ame asservie.
Si je ly, si j’escry, si je parle ou me tais,
Vostre œil me fait la guerre et ne sens point de paix,
Combatu sans cesser de sa rigueur extrême.
Bref, je vous aime tant que je ne m’aime pas,
De moy-mesme adversaire, ou si je m’aime, hélas !
Je m’aime seulement pour ce que je vous aime.
XXI
Vous me cachez vos yeux (las ! trop cruellement)
Apres qu’ils m’ont blessé d’une playe inhumaine ;
Ces yeux, mon seul confort en l’amoureuse paine,
Retournez-les, madame, et voyez mon tourment.
Quand le chef d’une armée a valeureusement
Desfait ses ennemis estendus sur la plaine,
Par le camp des vaincus superbe il se promaine,
Et regarde les morts plein de contentement.
Vous donc qui, par l’effort de vostre belle veuë,
De mon cœur indonté la victoire avez euë,
Laissant mon foible esprit en proye abandonné,
Si vous n’avez desir de m’estre favorable,
Au moins tournez vos yeux dessus moy miserable,
Pour voir le coup mortel que vous m’avez donné.
- ↑ Imité d’un sonnet italien qui commence par ces vers :
Deh ! perche questo sole, che ’l suo lume
Qua giù disceso novamente splende,
A gli altri luca, a me foco rende,
E fra tanti me sol par che consume ?
