Je tremble, en vous voyant, d’aise et d’estonnement,
De vostre seul regard ma blessure s’allege.
Jamais autre que vous constant ne me rendra ;
Je suis serf de Diane, et qui me retiendra
Doit estre chastiée ainsi que sacrilege.
LXXV
Ô vers que j’ai chantez en l’ardeur qui m’enflame,
Je deviens à bon droit de vostre aise envieux !
Vous viendrez en la main et retiendrez les yeux
Qui retiennent ma vie en l’amoureuse flame.
Gardez-vous seulement des regars de ma dame,
Ardans flambeaux d’amour, benins et gracieux,
Car s’elle peut brûler les mortels et les dieux,
Elle vous brûlera comme elle a fait mon ame.
Je sçay qu’il eust fallu, pour monstrer son pouvoir,
Un esprit plus divin, plus d’art, plus de sçavoir ;
Mais, estant plein d’amour, je fuy tout artifice.
J’écry ce que je sens, mon mal me fait chanter,
Et le plus beau laurier que j’en veux meriter,
C’est d’alleger ma peine et la rendre propice.
STANCES
Belle et fiere deesse à qui je suis voüé,
Dont le premier regard rendit Amour mon maistre ;
Le ciel durant cet age ici-bas m’a fait naistre,
Afin qu’à son honneur vostre honneur fust loüé.
Comme dans un miroir on voit toutes les graces
Au clair de vostre teint, et le vainqueur des dieux
Est aveugle deux fois quand vous fermez les yeux,
Et sans vous ses brandons seroient changez en glaces.
Plus j’ay de connoissance et plus je suis ravy
De voir que c’est à vous que le ciel me destine :
Car, bien que mon esprit ait celeste origine,
Il se tient bien-heureux d’estre à vous asservy.
Aussi tous les tourmens des cœurs plus miserables,
Et ce qui plus souvent fait les hommes changer,
Oubly, nouveau plaisir, course du tans leger,
N’ont pouvoir d’ébranler mes pensers immuables.
Je sçay bien que tout change et qu’il est mal-aisé
Que de rien si certain l’homme donne asseurance,
Puisque l’ordre varie et que tant d’inconstance
Se trouve aux elements dont il est composé.
Mesme l’an qui ce jour commence et renouvelle
