LXI
Madame, apres la mort, qui les beautez efface,
Je tien que nous irons à l’infernal tourment,
Vous, pour votre rigueur ; moy, pour trop follement
Avoir creu mon desir et suivi son audace.
Mais, pourveu que Minos nous loge en mesme place,
Vostre mal pres de moy sera plus vehement,
Ou j’auray, vous voyant, tant de contentement,
Que je ne sentiray douleur, flame ny glace.
Car mon ame, ravie en l’objet de vos yeux,
Au milieu des enfers establira les cieux,
De la gloire eternelle abondamment pourveuë ;
Et quand tous les damnez se voudront émouvoir
Pour empescher ma gloire, ils n’auront le pouvoir,
Pourveu qu’estant là bas je ne perde la veuë.
LXII
Las ! on dit que l’espoir nourrit l’affection,
Et qu’il garde qu’amour ne meure à sa naissance ;
Et j’aime toutesfois, n’ayant nulle esperance,
Car trop haut est l’objet de ma presomption.
Il n’y a cruauté, peril ny passion,
Qui me sçeust démouvoir de ma perseverance,
Et la seule douleur qui vainq ma patience,
C’est que je sois contraint d’user de fiction.
Je considere assez qu’en si haute entreprise
Trop de discretion ne peut estre requise ;
Mais, s’il en faut user, je m’y force à regret.
Las ! contre ma raison mes sens sont en querelle,
Mille debats confus renversent ma cervelle !
En ces troubles d’esprit pourrois-je estre discret ?
LXIII
Amour a mis mon cœur comme un rocher à l’onde,
Comme enclume au marteau, comme une tour au vant,
Et comme l’or au feu, dont je pleure souvant
Et crie à haute voix, sans qu’aucun me responde.
Las ! tes yeux sont luisans, et ta tresse m’est blonde
Seulement pour mon mal, car je vay recevant
Les flots, les coups, l’haleine, et le feu trop vivant,
Sans varier ma foy, qui plus ferme se fonde :
L’onde, c’est ton orgueil, le marteau, mon tourment,
