Page:Œuvres de Henri d’Andeli, trouvère normand du XIIIe siècle, 1881.djvu/160

« Nous eſtaignons toutes les ſois. »
Dont saut en piez le vin d’Auſois,
Li bons gentiz vins et roiaus :
« Eſparnai, trop es deſloiaus !
« Tu n’as droit de parler en cort.
« Je ſui cil qui la gent ſecort ;
« Entre moi et ma damoiſele
« Longue tonne de la Moſele,
« Nous ſecorons les Alemanz,
« Nous feſons treſtoz noz commanz ;
« Aux Coloingnois prenons l’argent
« Dont nous repeſſons nostre gent. »
Lors diſt li vins de la Rocele :
« Vous, Auſſai, & vous, la Mouſele,
« Se vous paiſſiez cele gent herre,
« Je repais treſtoute Engleterre,
« Bretons, Normans, Flamens, Galois,
« Et les Eſcos et les Irois
« Norois & cels de Danemarche ;
« Juſques la dure bien ma marche ;
« Je ſui des vins li ſebelins,
« J’en aport toz les eſterlins. »
Li vins S. Jehan d’Angeli
Si diſt a Henri d’Andeli
Qu’il li avoit crevé les ex
Par ſa force, tant eſtoit prex.
Engoleſme, Bordiaus & Saintes,
Cil i firent bien lor empaintes ;