solutions du plan de la Roulette, dont il y avoit plusieurs copies, avec une excellente methode de maximis et minimis de Mr de Fermat, il envoya l’une et l’autre à Galilée, sans en nommer les Autheurs : il est vray qu’il ne dit pas precisement que cela fust de luy ; mais il écrivit de sorte qu’en n’y prenant pas garde de prés, il sembloit que ce n’estoit que par modestie qu’il n’y avoit pas mis son nom ; et, pour deguiser un peu les choses, il changea les premiers noms de Roulette, et Trochoïde, en celuy de Cycloïde[1].
Galilée mourut bientost apres, et Mr de Beaugrand aussi. Toricelli succeda à Galilée et, tous ses papiers luy estant venus entre les mains, il y trouva entre autres ces solutions de la Roulette sous le nom de Cycloïde, écrites de la main de Mr de Beaugrand, qui paroissoit en estre l’Autheur ; lequel estant mort, il crût qu’il y avoit assez de temps passé pour faire que la memoire en fust perdue, et ainsi il pensa à en profiter.
Il fit donc imprimer son Livre en 1644. dans lequel il attribuë à Galilée ce qui est deu au P. Mersenne, d’avoir formé la question de la Roulette ; et à soymesme ce qui est deu à Mr de Roberval, d’en avoir le premier donné la resolution : en quoy il fut non-seulement inexcusable, mais encore mal-heureux ; car ce fut un sujet de rire en France, de voir que Toricelli s’attribuoit en 1644. une invention qui estoit publiquement et sans contestation reconnue depuis huict
- ↑ Vide supra p. 159, note 1.