fait en voulentés tenans ensemble, et y en a de deux façons : dont les ungs sont de harnoys blanc et les autres de cuir boully, lesquelles deux façons tant de harnoys
blanc que aussi de cuir boully sont paintes cy dessoubs.
Icy aprés s’ensuit la forme et manière des gardebras et avantbras tant de harnoys blanc que de cuir boully.
La forme et façon des gantelez est telle que on peult veoir cy dessoubs en figure.
Icy après est pourtraicte la façon et la manière des gantelez.
Item, l’espée rabatue doibt estre en la forme et manière cy après painte, et semblablement la masse.
Icy après est pourtraicte la façon et la manière de l’espée et de la masse.
De la mesure et façon des espées et des masses, n’y a pas trop à dire, fors que de la largeur et longueur de la lumelle ; car elle doibt estre large de quatre dois, à ce qu’elle ne puisse passer par la veue du heaulme, et doibt avoir les deux tranchans larges d’un doy d’espez. Et affin qu’elle ne soit pas trop pesante, elle doibt estre fort voidée par le meilleu et mosse devant et toute d’une venue se bien pou non depuis la croisée jusques au bout, et doibt estre la croisée si courte qu’elle puisse seulement garentir ung coup qui, par cas d’aventure descendroit ou viendroit glissant le long de l’espée jusques sur les doiz, et toute doibt estre aussi longue que le bras avec la main de celluy qui la porte, et la masse par semblable. Et doibt avoir ladite masse une petite rondelle bien clouée devant la main pour icelle garentir. Et peult-on, qui veult, atacher son espée ou sa masse à une déliée chaesne, tresse ou cordon autour du bras, ou à sa sainture, à ce que se elles eschappoient de la main on les peust recouvrer sans cheoir à terre.
