cuir boully, laquelle doibt estre bien faultrée d’ung doy d’espez, ou plus par le dedens ; et doibt contenir ladite pièce de cuir tout le sommet du heaulme, et sera couverte ladite pièce du lambequin, armoyé des armes de cellui qui le portera. Et sur ledit lambequin au plus hault du sommet sera assis ledit timbre, et autour d’icellui aura ung tortis des couleurs que vouldra ledit tournoyeur du gros du bras ou plus ou
moins à son plaisir.
Item, le heaulme est en façon d’ung bacinet ou d’une cappeline, réservé que la visière est autrement, ainsi que cy dessoubs est paint. Et pour mieulx faire entendre la manière du timbre, du cuir bouilly et du heaulme, ils seront cy dessoubs pourtrais en troys façons.
Icy après s’ensuit la façon et manière du bacinet du cuir boully et du timbre.
Item, le harnoys de corps est come une cuirasse ou comme ung harnoys à pié qu’on appelle tonnellet. Et aussi peult-on bien tournoyer en brigantines qui vueult ; mais en quelque façon de harnoys de corps que on vueille tournoyer, est de nécessité sur toute rieus, que ledit harnoys soit si large et si ample que on puisse vestir et mettre dessoubz ung porpoint ou courset ; et fault que le porpoint soit faultré de troys dois d’espez sur les espaules, et au long des bras jusques au col, et sur le dos aussi, pourceque les coups des masses et des espées descendent plus voulentiers ès endrois dessus dis que en autres lieux. Et pour veoir la principalle et meilleure façon pour tournoyer, sera figuré cy dessoubs une cuirasse pertuisée en la meilleure et plus propre façon et manière quelle peut estre pour ledit Tournoy.
Icy après est pourtraicte la manière et la façon de la cuirasse et la forme des armeures de bras propres pour tournoyer.
C’est assavoir, gardebras, avantbras et gantelez ; lesquels avantbras et gardebras
