Desprins de biens et de parens,
Qui n’ont vaillant l’anse d’un ceau,
Chascun de mes biens ung faisseau,
Ou quatre blancs, s’ilz l’aiment mieulx ;
Ils mengeront maint bon morceau,
Ces enfans, quand je seray vieulx !
Item, ma nomination,
Que j’ay de l’Université,
Laisse par resignation,
Pour forclorre d’adversité
Paouvres clercs de ceste cité,
Soubz cest intendit contenuz :
Charité m’y a incité,
Et Nature, les voyant nudz.
C’est maistre Guillaume Cotin
Et maistre Thibault de Vitry,
Deux paouvres clercs, parlans latin,
Paisibles enfans, sans estry,
Humbles, biens chantans au lectry.
Je leur laisse cens recevoir
Sur la maison Guillot Gueuldry,
En attendant de mieulx avoir.
Item plus, je adjoinctz à la Crosse
Celle de la rue Sainct-Anthoine,
Et ung billart de quoy on crosse,
Et tous les jours plain pot de Seine,
Aux pigons qui sont en l’essoine,
Ensserez soubz trappe volière,
