Mon cœur hautain médisoit de l'Amour
Seconde partie des Muses françoises, Texte établi par Despinelle, chez Matthieu Guillemot, (p. 232).
SONNET.
Mon cœur haultain meſdiſoit de l’Amour,
Et meſpriſoit en tous lieux ſes myſteres ;
Ores ie ſens tes puiſſantes choleres,
Pardon, Amour, ie te ſuyurai touſiour :
Ainſi diſoit empeſtré de maint tour,
De lierre ſeinct, de pampre & de viperes
Penthé hurlant ſoubs les Bacchantes fieres,
Qui diſſipoient & ſon corps & ſon iour.
Ainſi crioit (diſoit l’Amour farouche)
c’eſt inſenſé ; mais le cri de ſa bouche
Ne ſceust fleſchir l’vne ny l’autre Sœur :
Tu en mourras, ne demande point grace,
C’eſt œil brillant t’eſtendra sur la place,
Et ces beaux doigts deſmembreront ton cœur.
A. D. V.