Les Chroniques de Sire Jean Froissart/Livre I, Partie I/Chapitre CXXVIII
CHAPITRE CXXVIII.
Ce siége fait et arrêté devant la cité de Tournay, si comme vous avez ouï, dura longuement ; et étoit l’ost de ceux de dehors bien pourvu et avitaillé de tous vivres et à bon marché, par ils leur venoient de tous les côtés par terre et par yaue. Si y eut, le siège durant là environ, plusieurs belles appertises d’armes, car le comte de Hainaut, qui étoit hardi et entreprenant, avoit si pris en cœur cette guerre, combien que de premier il en fut moult froid, que c’étoit celui par qui se mettaient sus toutes les envayes et les chevauchées ; et se partit de l’ost à une matinée ; à bien cinq cents lances, et s’en vint passer dessous Lille, et ardit la bonne ville de Seclin et grand’foison de villages là environ ; et coururent ces coureurs jusques dedans les faubourgs de Lens en Artois. Tout ce fut recordé au roi Philippe son oncle, qui se tenoit à Arras ; si en fut moult courroucé, mais amender ne le put tant qu’à cette fois.
Encore après cette chevauchée en remit le dit comte une sus, et chevaucha adonc devers la bonne ville d’Orchies. Si fut prise et arse, car elle n’étoit point fermée, et Landas et La Celle[1] et plusieurs autres villages qui sont là en ce contour ; et coururent tout le pays où ils eurent très grand pillage, et puis s’en revinrent arrière au siège de Tournay
D’autre part les Flamands assailloient souvent eëux de Tournay, et avoient fait en nefs sur l’Escaut beffrois[2] et atournemens d’assauts ; et venoient heurter et escarmoucher presque tous les jours à ceux de Tournay. Si en y avoit de sevrés des uns et des autres, et se mettaient à grand’peine les Flamands de conquérir et dommager Tournay, tant avoient pris la guerre en cœur. Et on dit, et voir est, qu’il n’est si felle guerre que de voisins et d’amis.
Entre les assauts que les Flamands firent, il y en eut un qui dura un jour tout entier. Là eut mainte appertise d’armes faite ; car tous les seigneurs et les chevaliers qui en Tournay étoient furent à cet assaut ; et étoit le dit assaut en nefs et en vaisseaux à ce appareillés de long temps, pour ouvrir et rompre les barrières de la poterne de l’arche ; mais elles furent si bien défendues que les Flamands n’y conquirent rien ; ainçois perdirent une nef toute chargée de gens, dont il en eut plus de six vingts noyés, et retournèrent au soir tous lassés et travaillés.