Les Amours (1553)/Poème 72
Les amours de P. de Ronsard Vandomois, nouvellement augmentées par lui, & commentées par Marc Antoine de Muret. Plus quelques odes de l'auteur, non encor imprimées
chez la veuve Maurice de la Porte, (p. 84-85).
Petit nombril, que mon penser adore,
Non pas mon oeil, qui n’eut onques ce bien,
Nombril de qui l’honneur merite bien
Qu’une grand’ vile on lui bastisse encore.
Signe divin, qui divinement ore
Retiens encor l’Androgyne lien,
Combien & toi, mon mignon, & combien
Tes flancs jumeaus folastrement j’honore!
Ni ce beau chef, ni ces yeus, ni ce front,
Ni ce dous ris, ni cette main qui fond
Mon coeur en source, & de pleurs me fait riche:
Ne me sauroient de leur beau contenter,
Sans esperer quelque fois de tâter
Ton paradis, ou mon plaisir se niche.