Les Amours (1553)/Poème 210
Les amours de P. de Ronsard Vandomois, nouvellement augmentées par lui, & commentées par Marc Antoine de Muret. Plus quelques odes de l'auteur, non encor imprimées
chez la veuve Maurice de la Porte, (p. 234-235).
Telle qu’elle est dedans ma souvenance
Je la sen peinte, & la bouche, & les yeus,
Son dous regard, son parler gratieus,
Son dous meintien, sa douce contenance.
Un seul Janet, honeur de nostre france,
De ses craions ne la portrairoit mieus,
Que d’un Archer le trait ingenieus
M’a peint au coeur sa vive remembrance.
Dans le coeur donque au fond d’un diamant
J’ai son portrait que je suis plus aimant
Que mon coeur mesme, o sainte portraiture,
De ce Janet l’artifice mourra
Frapé du tans, mais le tien demourra
Pour estre vif apres ma sepulture.