Le teſtament de carmentrant a.viii.perſonnaiges
|
Carmentrant. Archiepot. Tyre lardon. Leche froye. |
Careſme. Haren Souret. Teſte daulx. Ognions. |
Or ſa amis Carmentrant
A poſſede trop longuement
Le ſiege qua moy appertien
Et iniuſtement le detien
Me ſemble que trop retardons
Car iuſte cauſe nous tenons
Et pour ce armer il ſe fault
Contre ce gros villein marpault
Qui & longuement tien mon ſiege
¶ Nous ſerons de voſtre college
Moy tout ſeul aſſallir liray
Et depart vous ie luy diray
Quil nous veullie rendre la place
Ou aultrement ſans auoir grace
Il ſera par nous affolle
¶ Il ſera ſi bien bricolle
Se vne foys ſent mon alleyne
Ie la luy douray plus ſoubdaine
De me voyr de peur tremblera.
¶ De peur le croy crie deia
Se de luy vng coup ie mapprouche
Ie iouueray a tourche lorche
Il cognoiſtra la ouie paſſe
Eſtroict luy douray ſur ſa face
Ce viſaige cherubine
Encour quil ſoyt illumine
Il ſe rendra ou ie mouray
Pource amis eſcoutes moy
Teſte daulx luy voys enuoyer
Affin de luy annuncer
Quil ne faſſes rebellion
Ie veulx prendre poſſeſſion
Teſte daulx va haſtiuement
A carmentrant le grant gormant
Dis luy a coup ſans plus attendre
Quil ſe diſpoſe de foy rendre
¶ Mellieu ne poues entreprendre
Meſſagier Dance que ie ſuys
Il ſcaict bien que trop fort puidz
Et croyes quant il me verra
De peur ſon corps tremblera
Quant ie luy diray mon aduis
Ny aura perdrix ne conilz
Tache budin ne Archiepot
Que tout ne trebuchie a vng coup
Seulement ſentant ma feureur
¶Teſte daulx fay quayes honneur
¶Adieu dame de grant valleur
Senua Teſte daulx a Careſme
¶Teſte daulx faictz quayes honneur
Se tayt careſme & dit carmentrant
Vouldries vous plus ioyeuxſe vie
Que ie tiens table ouuerte
Ne me chault de gains ou de perte
Point ne fus ſubiect a ſoulcy
Ie mange bouli & rouſti
Ie ſuis le plus gentil du monde
Tout le monde a moy ſe fonde
Des feſtes que font en tout lan
La mellieurs queſſe carmentrant
Ie ſuys ioyeux, ie ſuis plaiſant
Ie fais dancer ie fays galler
Et le vin claret aualler
Ie fays a controuuer chambrieres
Ses nourriſſes qui ſont legeres
Qui contrefont les pucelletes
De nuit font le ieu damorettes
Ie fais le monde reiouyr
Taborins & auboys ouyr
Ie ſuis tout rempli de lieſſe
Ie ſuis le tuteur de ieuneſſe
A grant chiere ie me tranſporte
Les derniers ſarreront la porte.
Il conuient que lon ſe deſporte
Ainſſi quancy il fault morir
Ne vault myeulx le corps bien nourir
Fere grant chiere a oultance
II nya nulle reſidence
Quant la mort vient tout fault laiſſer
A celle ne conuient pencer
Pourquoy ſont les biens pour gaudir
Dancer iouuer ſoy reiouyr
Auec dames & damoiſelles
Auec chambrieres & pucelles
Nous ne ſommes point vſuriers
Comme ceulx qui ont les greniers
Plain de ble & noſent menger.
Cella me feroit enrager
Dieu me garde de tel malheurt
Boyre veulx touſiours du mellieur
Quoy qui couſte quoy que lon die
Au monde nauons que lauie
Dequoy ſert eſtre chiche face
Quoy que faſſes ne que amaſſe
Tel apres toy les iouyra
Qui mille foy te meuldira
Ie boys a vous
Acoup grant chiere
Nous viurons iuſques a la mort
Layſſons en paix tout deſconfort
Carmentrant faict grant chiere beuuent dautat
Surie bien teſte daulx a careſme.
De par careſme te ſalue
Gros pauſart pence de toy rendre
Et pences a mes ditz reſpondre
Laiſſant la place a ma maiſtreſſe
Se tu veulx uſer de rudeſſe
En brief ſera faict de ta vie.
Oſtes moy ſeſte villennye
Se puant, ce villain infame
Quant ie te ſens mon cueur ſenflame
Son allain me fera morir
Quant verras careſme venir
Auec ſes gens tu trembleras
Rendz toy de bon gre & ſeras prins a merci.
Faictes le touſt vuyder dicy
De le voir le cueur me faict mal
Vuyde dyci
Deſhors deſhors
Tu puitz plus que charongne.
Va hors dyci & ſe tu gronnye
Il ne te giſt que de la vie
Careſme ne feuſt oncq mamie
Va acomplir ſon meſſage
Deſlouge dyci ſe es ſaige
Ou ie te feroy mal contant
Sus mes amis beuons daultant
Maulgre careſme.
Dame dieu vous tienne en lieſſe
Ie viens a carmentrant parler
Lequel ma faict deſchaſſer
Diſant que de vous na que fere
La place rendre il differe
Et en rien ne vous eſt tenu
Eſt il vray
Priſonnier ſera retenu
Naues vous pas tous bon corage
Ie me veulx venger de loultraige
Et par ſur luy ſeray maiſtreſſe
Chaſcun aye cueur hardieſſe
Ie te veulx aller aſſallir
Tout de ce pas & ſans fallir
Luy monſtreray que ie ſcay fere
Si ie ſuys vng coup en colere
Il ſera pris ie ſuis certain
Ie luy feray ſentir ma main
Sil conuient fere reſiſtence.
Sera il dit par ſa meſchance
Quil ſoit maiſtre par deſſus nous
Nous ſommes tous ſubiectz a vous
Pour morrir a voſtre ſeruice
Il conuient remonſtrer le vice
A ce panſart a ce gormand
Il luy conuient bailler malan
Puiſquency nous veult meſpriſer
Il luy fault chiar & os briſſer.
Sans merci en auoir aulcune
Argent ny aura ne pecune
Rouſti bouli ne friandiſe
Il ne fault plus ſouffrir tel guyſe
Mais le chiaſſer villainement.
Or allons ſur luy hardiment
Eſtes vous preſtz
Ie le pourſuyuray de ſi pres
Et laſſault aura ſi ſoubdam
Quant il ſentira noſtre allam
Il naura force ne demi.
Or ſus enfans a luy a luy
Soyons vaillans ſeſte iournee
La teſte me ſoyt trenchee
Se il ne faictz bien mon debuoir.
Ainſi que puis appercepuoir
Il ne nous oſeroit attendre
Ne naura moyen ſe deffendre
Mais ſe rendra ie le ſcanctz bien
Frappons deſſus
Ie le veulx bien
Que lon ſauance.
A frapper ay grant deſirance
Alles commencer la meſlee
Moy & ognions ſans demeuree
Vous dourrons ſecours hault & bas
Rendez vous.
A mort a mort.
Tue, tue.
A coup prenons.
Bon courage mes compaignons
Hardi hardi a la bataillie
Frappes tous deſtoc & de tallie
Deffendes moy ou ie ſuis mort.
Rendz toy villain
Vuydes ſoubdain
Ou vous aures male iournee
A mort, a mort.
Vous recepures male nuytee.
Ie suis bleſſe.
Dieu ie ſuis mort
De plus attendre ſeroys ſot
Lon ma frappe de tous couſtes
Ie men voys ſe plus me tenes
Ie veulx que bachus me maudie
Aſſes faict que ſchappe ſa vie.
De ſa mort Il vault mieulx quil viue
Ie conclus par raiſon viue
Ainſi qua eſte dit deuant.
Que lon le baniſſe deuant
Oſtes le deuant ma preſence
Teſte daulx donne la ſentence
De le ſentir le cueur me part.
Sans plus appeller aultrepart
Ce pais te fault abſenter
Dans nullement y habiter
Per ſept ſepmaines ſeullement
Et vuyder tout incontinent
Mais pour non vſer de rigueur
Tu auras ieſſe par tuteur
Dauid, moſſe, & aſcougayne
Et le venerable caucayne
Cohen toute ſa progenie
La lignee & ſa menye
Or va que plus ie ne te voye
Pences ſoubdain prendre ta voye
Or puys que fouyr me conuient
A dieu de foys ne ſcay combien
Mon prince & abbe foulas
Son treſorier & hault & bas
Les bons compaignons de la ville
Qui vont iour & nuyt a la rible
Adieu paſſe temps & eſbatz
Adieu cabaretz & ſabatz
Adieu bourgoys marchans auſſi
Adieu les enfans ſans ſoulci
Adieu a tous bons gaudiſeurs
Ie vous laiſſe les rouiſtiſſeurs
Et bonnes tauernes auſſi
Adieu nobles adieu marchans
Genſdarmes qui vont ſur les champs
Adieu vous dis tout maintenant
Ayes pitié de carmentrant
Adieu bourgois & mecanicques
Adieu laboreurs & gens mixſtes
Or adieu gens de tous eſtatz
Car carmentrant ſen va a cras
Adieu dames & damoyſelles
Adieu gorgiaſſes pucelles
Adieu maries auſſi
Car carmentrant ſen va tranſi
Adieu nouriſſes & chambrieres
Adieu glorieuſes troppieres
De tenier pie ſeſt grant folie
De fouyr eſt groſſe ſageſſe
Se lon me treuue a la preſſe
Ie ſuys content deſtre tondu.
Qui ſera pris ſera pendu
Hault & court il en eſt certain.
Ie me traualhe yci en vain
Iay de coups par ma recompence
Souent celluy qui gaigner pence
Eſt deſconfit dont eſt mellieur
Sen fuyr que ſuyure malheurt
Rends toy rends toy
Il ny a ordre
Helas helas or me fault rendre
Non par droict amis ſeſt par force
Pluſtouſt men yray en eſcoſſe
Que de morir a mon eſſien
Tu as diſſipe tant de bien
Mais maintenant la chepteras.
Iay laiſſe vng iambon bien gras
Et ſuys bleſſe dont me deſplait
Ie trouue le cas trop layt
Se fere tuer par aultruy
Deulx ie fuys eſchappemeſhuy
Fi fi ie monſtre les tallons.
Sa carmentrant nous vous tenons
Maintenant en noſtre pouuoir
Mourir te fault a dire voir
Tues mon ennemi mortel.
Sur ce point ſe fault arreſter.
Sans iuger ſi ſoubdainement
Ia ſoit ce quil eſt grant gormant
Il ne faict tort que a ſoy meſme
Pource par mon opinion
Que lon lenuoye en auignon
En iuſlerie cheux ieſſe
Auec david & macquaſſe
Par ſept ſepmaines ſept raiſon
Quil demeure leans en priſon
Quant eſt a mon intention
Seroit tort le fere morir
Il a faict dancer galler corir
Il a eſte bon compagnon
Gorgial gentil & mignon
Sil moroit ſeroit gros dommaige
Mettre le conuent en ſeruage
Ainſi que teſte daulx a dit.
Dame voila vng bon eſdit
Vous ne ſaries auoir prouffit
Qui ſont du tallon trop legieres
Adieu putains & macquerelles
Qui contrefaictes les pucelles
Adieu tauernieres rouſtiſſeurs
Adieu iouyeurs & gaudiſſeurs
Adieu carmes & auguſtins
Moynes qui mangent gras louppins
Chartreux auec leur coqueluche
Chanoynes auecques lauſmuſſe
Adieu tauernes tauernieres
Adieu gens de toutes manieres
Adieu riberies maintenant
Ayes pitie de carmentrant
Adieu taborins & auboys
Ie vous prie a ſeſte foys
Que rioyſſes maintenant
Adieu le poure carmentrant