E ſeroit vn dommage infini pour les curieux, ſi l’oubli enſeueliſſoit les actiōs magnifiques des Princes de Nabadonce : auſſi ce leur ſera vn profit exquis, de voir au iour les eſfaits de ſi rares conſequences égales preſques à la lumiere. Tous les beaux eſprits qui s’adonneront à ces auātures beniront l’heure en laquelle leurs yeux aurōt eſté ouuerts pour diſcerner ces diſcours, & ſentiront en eux meſmes vn abſolut contentement, ſi toſt qu’ils pourront deſcouurir quelque deſſein : Or que chacun qui voudra ſ’y delecte, quant à moy i’ay pris plaiſir à retracer ces belles rencontres que i’auois comme delaiſſees, mais la bonté de mon cœur, & les excellēces de mes penſees m’ont incité à pourſuiure, à ce que les eſteincelles de mes delices illuminent pluſieurs qui ſ’eſiouiront de la naiſſance de cet ouurage.
