Le Moyen de parvenir
- Recenſuit Sapies ab A, ad Z.
Hac iter eſt.
Si Madame m’euſt ſurueſcu,
I’euſſe commencé cet ouurage.
Quand la Mort s’en torcha le cu
I’eu le cœu mou comme fromage.
ar eſt il, que ce fut au temps, au ſiecle,
en l’indiction, en l’Aere, en l’Hegire, en
l’hebdomade, au luſtre, en l’Olimpiade,
en l’an, au terme, au mois, en la ſepmaine,
au iour, à l’heure, à la minute, & iuſtement à
l’inſtant, que par l’auis & progrez du Daimon des
ſpheres les eſteufs deſcheurent de credit, & qu’au lieu
d’eux furent auancees les molles balles, au preiudice de la noble antiquité, qui ſe jouoit ſi joliment. Confuz
ſoient ces inuenteurs de nouueautez, qui gaſtent la
jeuneſſe, & contre les bonnes couſtumes troublent nos
jeux. N’eſt ce point au jeu où l’ame ſe dilate pour faire
voir ſes conceptions ? Si vn diable jouoit auec vous il
ne ſe pourroit feindre, il vous feroit voir ſes cornes.
Mais qu’eſt ce que jouer ? c’eſt ſe delecter ſans penſer
en mal. Beaucoup de maux ſont auenus à cauſe de ce
changement, qui troublera l’intelligence des hiſtoires,
& gauchira toute la mappe-monde. Voyez combien
deſia en ſont venus de troubles, guerres, maux, veroles
& telles petites mignardiſes qui chatouillent malheureuſement
les perſonnes pour les faire rire. Tant de
ſages qui eſtudient aux auantures attribuent tels effects
à d’autres cauſes, comme au retranchement des dix
jours, depuis quoy on n’a fait vendanges que par
rencontre de ſaiſon, aux pullulations d’hereſies, depuis
leſquelles les boſſes n’ont peu eſtre plattes, aux reuoltes
des grands qui ſont occaſion que fillettes ont hanté les
cloiſtres, & les menagers les tauernes, aux hauſſements
des tailles, durant quoy les vieilles gens ne font que
rechigner, & infinitez autres ſotiſes, dont ie ne ſuis
point controlleur, dautant qu’il ne m’appartient pas
d’entreprendre ſur vous. Et bien en cet excellent periode
il auint ce que vous ſçauez, & ie vous iure ſans iurer,
que tout eſt vray. Si vous me preſſez ie vous defonceray
trois ou quatre ruades toutes brodees de cremoify,
& iureray comme vn homme, ou bien ie priray mon voiſin de iurer pour moy, ainſi que feit le ſire Guillaume,
qui preſſé du Iuge de iurer luy dit ainſi ; « Monſieur ie ne
ſcay point iurer, parce que ie n’ay pas eſtudié ny eſté
à la guerre, & ne ſuis docteur, ny gendarme, ny gentilhomme ;
mais i’ay vn frere qui iurera pour moy. »
Il
fut donc en ceſte ſaiſon ſonné, trompé, trompeté, corné,
(comme vous voudrez, prenez au gouſt de voſtre ratte)
& crié, huché, dit & proclamé auec la trompe philoſophique,
que toutes ames qui auoient ſerment à la
Sophie ſe trouuaſſent au lieu ſuſdit, ainſi qu’il auoit
eſté ordonné & promis auec ſerment ſolemnel, comme
il eſt ordinaire és affaires ſerieuſes de la benoiſte
couſtume des Sages ; pour aſſeurance dequoy les enfans
de la ſcience auoient mis la main au ſymbole de la
conſcience. Parquoy nous fusmes tous reſolus de nous
trouuer chez le bon homme noſtre pere ſpirituel, parce
qu’il auoit eſté ordonné & iugé en dernier reſſort de
ſerrure, d’horloge, de cranequin, de rouet, de routiſſoir,
d’arbaleſte, & que les deffaillans ſeroient mis à la nois,
à la noiſette, au noyau, & à l’amende. A cet eſclat de
mandement ie ne failliſmes à nous trouuer, auſſi auions
nous promis de nous bien chercher pour cet effect ; &
puis ie l’auions iuré, & ſçachez que c’eſt vn grand
peché de faillir parmi nous, pource que nous ſuyuons
vniquement la regle de perfection en promeſſe. Et bien
que ce ſoit vne ordinaire, gliſſee de pere en fils pour
gens de bien, coulée de mere en filles pour femmes
d’honneur, d’oncle à neueu pour gens d’Egliſe ; ordinaire (diſie) comme ces docteurs qui enfilent leurs diſcours ;
que promettre & tenir eſt tout ce qu’vne perſonne
de bien peut faire, & qu’il n’appartient qu’à ceux
qui ſont iſſus de damoyſellerie & de gentilhommette, ſi
en a ton menti vn petit, & ie le vous diray auſſi honneſtement
que fit Coquereau à monſieur le Preſident
ſon maiſtre. Il eſtoit ſommelier & nous boyuions frais
& bon, ie diſois que le vin eſtoit bas, monſieur diſoit
qu’il eſtoit à la barre, madame dit, « Et bien ſommelier
qu’en eſt il ? — Ha ha, dit il, monſieur n’a menty de
gueres. » Promettre eſt facile, mais effectuer difficile,
de tenir il eſt aiſé, tenir ce que l’on promet eſt faire
comme le ſeigneur de noſtre parroiſſe, qui ne vous
refuſe rien, & baille encor moins.
Texte à compléter