Le Livre des oraisons/XXXI
XXXI
Tresfort Dieusur touz les esperis, et tres-puissant sur toutes choses comme ia en mes oroisons ay raconte une partie des biens que tu mas faits, combien que ie le die aucunefois iay pense le contraire, car ie cuidoye Sire aucune chose combien que ie ne soye rien, ie cuidoye estre riche et suy poure. Ie cuidoye estre stenent et ie suis desceu, et or ie voy Sire que senz toy on ne puet riens faire.
Tu mas aucunefoiz delaissie par quoy ie me cogneusse, car ie cuidoye estre souffisant par moy mesmes, ie ne cuidoye pas que tu me gouvernasses, maiz quant tu fois loing de moy ie tombay en moy, et le cheoir fu par moy, et le relever fu par toy. Tu Sire mas ouvert mes oyeulx tant que ie voy que temptation est la vie de lomme sur la terre et que nul ne se doit glorifier devant toy ne iustifer nul vivant ; car sil y a rien de bien petit ou grant ton propre don est ; de moy nest fors que mal. Que donc de ton bien donne à soy meismes fait gloire il est ton robeur et semblant au dyable qui veult ambler ta gloire que du don que tu li donnes veult estre loe et en celluy ne quiert ta gloire, maiz la sienne est tout descognoissant car de ton don ne te rent graces, maiz, tu Sire, le mien formateur du ventre de ma mère, ne laisses moy du tout cheoir. À toy Sire soit gloire duquel tout bien vient et à moy confusion de visaige et de misere du quel vient tout mal se tu ne veulz avoir mercy. Mercy certes as de moy et de tout quant que tu as fait.
Sire ie confesse a toy ma pourete que ie ne suy fors toute vanite et umbre de mort, et aucune prudence tenebreuse, et terre vaine et unite la quele senz ta beneiscon ne porte nul fruit fors confusion pechie et mort. Se iay en nul temps rien de bien ie lay de toy, tout quant que iay de bien de toy mest venu, moult de foys ie feusse peri se tu ne meusses gouverne. Ainsi tousiours Sire ta grace et ta misericorde a sont alez devant moy, delivrant moy de touz maulx rompant les laz, despachez devant moy ostant les occasions des causes, car se tu ne eusses ce fait ie eusse fait touz les pechiez du monde, car nul pechie nest que homme ayt fuit, que un autre ne le puisse faire, maiz tu feis que ie ne le feisse pas. Le dyable vint a moy et me tempta et lieu ne temps ne defaille, maiz tu Sire ne me lessas consentir, le dyable tresmauvaiz par quil moccie tousiours veille senz dormir, il gete devant moy divers laz, il a mis laz es richesces, laz es pouretes, laz en mengier, laz en boyre, laz en lit, laz en dormir, laz en veillier, laz en parole, laz en euvre, laz en toute ma vie, maiz tu Sire sil te plaist me delivreras des laz, et Sire vueillez ouvrir mes oyeulx par quoy ie voye lumiere et aille en tes voyes et puisse dire, benoist soit le Seigneur qui ne me laisse donner au dyable comme beste aux laz des chasceurs.