Le Livre des ballades/Je voi assés, puisque je voi ma dame
Ne quier veoir Medée ne Jaſon,
Ne trop avant lire ens ou mapemonde,
Ne la muſique Orpheüs ne le ſon,
Ne Herculès, qui cercha tout le monde,
Ne Lucreſſe, qui tant fu bonne & monde,
Ne Penelope auſſi, car, par ſaint Jame,
Je voi aſſés, puiſque je vois ma dame.
Ne quier veoir Vregile ne Caton,
Ne par quel art orent ſi grant faconde.
Ne Leandar, qui tout ſans naviron
Nooit en mer, qui rade eſt & parfonde,
Tout pour l’amour de ſa dame la blonde,
Ne nuls rubis, ſaphir, perle ne jame ;
Je voi aſſés, puiſque je voi ma dame.
Ne quier veoir le cheval Pegaſon,
Qui plus toſt court en l’air ne vole aronde,
Ne l’image que fiſt Pygmalion,
Qui n’ot pareil première ne ſeconde,
Ne Oleüs, qui en mer boute l’onde ;
S’on voet ſçavoir pour quoi ? Pour ce, par m’ame
Je voi aſſés, puiſque je vois ma dame.