Le Disciple de Pantagruel/1875/22
Comme Panurge voulut visiter plus amplement lesdicles ysles, et des trois fleuves singuliers qu’il trouva, et des arbres où croissent les craquelins et eschauldez.
CHAPITRE XXII.
OR, pource que les geographes et cosmographes font grosse estime d’icelles isles, nous les voulusmes bien perlustrer et visiter toutes de une part et d’aultre. Et en ce faisant, nous trouvasmes en icelles isles troys grandz fleuves, comme le Rosne ou le Rhin, d’une merveilleuse estimation.
Car l’ung est de vin blanc, le meilleur que jamais homme goustast.
Le second est de vin clairet, le plus excellent qu’il est possible de trouver en tout le monde.
Le tiers est de vin vermeil, qui passe en bonté tous les vins bastardz, tous les ambrosiades, malvoysies, et tous les ypocras qui feussent jamais.
Et y a du long d’iceulx fleuves des hayes d’arbres comme rosiers, ausquelz croissent les petitz gasteaulx, craquelins, eschauldez et petitz choulx, les plus frians et savoureux que jamais homme goustast.
Et pareillement le mestier et les oublies de toutes sortes, et ne couste sinon à prendre et à cueillir, comme vous feriez les roses sur ung rosier.
Sur les bortz et rives d’iceulx fleuves, vous trouverez les godetz et les tasses de Beauvais arrangez pour boire, sans avoir la peine de vous mettre à genoulx, le cul en hault, comme font les bergiers quand Hz boyvent en ung ru, ou en une fontaine, quand sont aux champs.
Et d’advantage, pour emporter d’iceulx vins, il y a de grandz arbres pleins d’estocz ausquelz pendent les flacons, barilz et bouteilles de toutes sortes, lesquelz chascun peult emplir d’icelluy vin et emporter là où il veult. Toutesfoys, les meilleurs, pource faire, sont noz beaulx flacons de Beauvais, qui sont azurez et bons à merveille, et se garde mieulx le vin en iceulx longuement frais et sans corrumpre, comme j’ay tousjours ouy dire à ceulx de nostre ville de Beauvais et à ceulx de Savignie et de Leraule, qui sont les lieux là où on les faict.