La Chasse (Gaston Phœbus)/Chapitre XXIII
(p. 118-119).
Chapitre vingt-troisième.
Du chenil où les chiens doivent demourer, et comment il doit estre tenu.
tem le chenil doit estre grant et large : de x toises de long et de v de large, s’il y a grand foyson de chiens. Et doit avoir une porte devant et une autre d’arrière ; et d’arrière un beau prael en quoy le souloill se veoye tout le jour, dès qu’il se levera, jusques qu’il se couchera. Et celuy prael doit être environné de palisse ou de terrasses, ou mur d’autant de long et de large comme le chenill ; et la porte d’arrière tousjours ouverte affin que les chiens puissent aler dehors esbatre vers le prael quant il leur plera ; quar trop fet grant bien à chiens quant ilz pevent aler dedenz et dehors là où il les plaira ; et plus tard en deviennent roinheux. Et doit avoir ou chenill petiz bastons fichiez, jusques à vj, entortilliés de paille, hors de leur litière, affin que les chiens vienhent pisser là. Et doit avoir une ou deux goutières ou chenill, par ont tout le pissat et yaues s’en voysent, que ou chenil n’en demuere rien ; et tout ce vueill-je aprendre à l’enfant. Le chenil doit estre bas et non pas en solier[1] ; mais doit avoir solier dessus, affin qu’il soit plus chaud l’iver et plus froit l’esté ; et tousjours de nuit et de jour vueill-je que l’enfant gisse avec les chiens ou chenill affin qu’ils ne se combatent. Et y doit avoir une grant cheminée pour eschaufer les chiens quant il fet froit, ou ils sont moilliez ou de pluye, ou de passer les rivières et li vueill aprendre de filer et fere les couples des chiens et tretz de limier, les quieuls doivent estre de cueue de chevauls ou de jumentes, quar ils valent mieulz et durent plus que se ils estoyent de corde ou de laine et doit avoir la couple d’un chien entre l’un chien et l’autre quant ilz sont accouplez un pié ; et le tret du limier trois toyses et demie. Et pour quant qu’il soit sage limier, c’est assés.
- ↑ Solier, étage de maison.