« Oiez, barons », feit Carles a la barbe florie,
« Troi nuet l’une pres l’autre, que ne dormoie mie,
« Demonstrez m’est saint Jaqes, que fort moi contrallie
« Que je aile ostoier sor la gent Paganie,
« Si com je l’ai promis au filz sante Marie
« Et au barons saint Jaqes, cui ai ma foi plevie
« Que je restorerai son chemins e sa vie.
« Jel jurai soz Vïene, en mé la praerie,
« Quant de moi e Gerard fu la gere finie
« E fu la pulcelle Aude por Rollant creantie ;
« Et vos lor promitistes, avant vostre partie,
« La corone d’Espagne, si Dés vos donast vie ;
« Je demand la promise, saciez qe ne la oblie.
« E pués ne veul q’il soit ma parole mentie
« D’aler en la Galiçe : je vos en quer haïe.
« Jameis non finirai si ert la voie ravie
« D’aler au saint apostre que tient la Paianie.
« Mon tresor met avant et ma grant manantie ;
« E je meisme i firrai de ma spee forbie
« Plus que ne fis quant je tornai en segnorie,
« Quant je fui forscacez de France por envie.
« Respondez li meilors ; ma parole est finie. »