| ◄ Laisse LXIII | Laisse LXIV | Laisse LXV ► |
Feragu garde, voit venir le marchis.
Irïemant, de mautalent espris,
Le cheval broce, si a son retor porpris.
Con esparviers randone a la perdris,
Vient uns vers l’autre des mortel enimis.
Feragu tient le grant bastons massis,
Et Oliver le roit espliez pontis.
Sor son escuz ferir veit l’Antecris ;
Sor le cantel a le coilp defalis,
Le fers avance enz en l’eume brunis,
Par vive force li a toluz dau vis,
Dont le Païens an fu tot esbaïs.
Desgrace cort au buens cons poestis,
Car les destrers s’entreürtent a pis,
Le pires n’oit cil au quens, ce m’est vis :
Le cuers i creve, mort cheit eu prez floris.
Sor Oliver versa l’Amoraïs :
Tant fu li ber dou cheval entrepris,
Lever ne puet, qi lui donast Paris.
Sor lui s’areste Feragu l’Arabis,
Le brant lui tolt, ne s’an est escremis.
Depués q’il fu de son brand deseisis,
De mort se dote, si se rend por chetis ;
E cil l’en maine par mié l’obers terlis.
Pués le demande : « Dont is, de quel peïs ?
« Coment as nom ? — Oliver, biaus amis. »
Dist Feragu : « Mout ai hoi bien conquis ;
« Ne te rendroie por la citez Betis. »