| ◄ Laisse DXXIII | Laisse DXXIV | Laisse DXXV ► |
Dit Soldan : « Frere, vetre venue m’agree,
« Mais non pués or dir tote ma pensee ;
« Parlerai vos quant une destinee
« Qe or m’avient pora estre achevee.
« Neporquant dites, aprés la comencee,
« A ce che pose feir vos chouse lohee,
« Estes vos home jantis de renomee,
« Dus, qens o prence ou de mendre ponee ?
« Ben croi que estes couse bieneüree.
« A le semblance de la couse celee
« Fust huei l’ensaigne por vos desvolupee,
« Qe le cors deinz respondist a l’entree,
« Encué avroie une bone jornee.
— Sir », dist le dus, « en la moie contree
« M’apelle l’en Lionés, fil la fee ;
« Onqe mon pere ne visqi de sodee,
« Mais marcheans de plus grant amasee
« Non fust trovei en Spagne la loee.
« Le grant richece ch’il avoit asenblee
« Me fist honor : a une Pasqe rosee,
« Avech qatorçes me fu cente la spee ;
« Chevalier sui. Si est la cause alee,
« Or m’est richece en poverté tornee,
« Mais povertei non pris une deree
« Qant a vestre onbre ai ma vie amenee.
« Non veul plus dir, mais a la tumultee
« Sui ci venus de vestre renomee. »
Respont Soldan : « Bone l’avés contee ;
« Alés seor tant q’il ert difinee
« Une autre cose qe ma joie a troblee. »