| ◄ Laisse DXII | Laisse DXIII | Laisse DXIV ► |
L’Endïen prant la ville a remirer ;
Dist a Rolant : « Molt par fait a prisier :
« Ce est La Mech, o allons Dex orer,
« Le saint Mahon que nos vient predicer ;
« Soudans de Perse en est le justiser ;
« Sor cestu laich marchisent maint princer.
« Mais molt me pois de ces trief merviller
« Et des banderes que je voi venteller :
« O il i a cort, o grandisme engombrer. »
Lor prant Rolant le cuers a sauteller
D’aute proesce, cant a oï nomer
La ville et cil que l’oit a gouverner.
Prant le stormant doucement a acoller.
« Sire », dist il, « de vos m’estuet sevrer :
« C’est le païs o je doi ariver,
« Car plevis l’ai, pasés cinque ans enter,
« Que je iroie Mahomet cellebrer.
« Je vos merci, non v’en pois gerdoner :
« Dou grant honor Dex vos rande louier. »
Chant cil l’oï, n’a en lui que aïrer.
« Comant ? » fa il, « me volés vos laissyer ?
« E cist avoir, qui le vos doit portyer ?
« Par Mahomet, molt vos voi fouloier
« Chant por le mals voulés le bien canger. »
Dist Rolant : « Sire, avoir ne m’a mester :
« Tot soie votre, senz autre parchoner.
« Mes bien vos voil par mon amor rover,
« Chant vos serés la o vos deveis aler
« E vos trouveis nuls poubre cevaler,
« Par mon amor l’en doveç visiter.
« Par moi le di, que sui uns estrainger :
« Ensi poroit d’un autre home incontrer.
« Se de mon nom voulisez domainder,
« C’est Bacharuf : ensi moi faiz nomer. »
Qui donc oïst Baudor fort dementer
E ses sergant plurer et regreter,
Souz ciel n’a home que non deüst peser.
Mes quant voient nel poront arester,
Trestuit s’an vont davant ajenoiler,
Qui piés, qui jambe, qui bras, qui main baiser ;
E pué s’an vont les governaus torner
En celle part o il devoit ariver.