◄ Laisse DXCV | Laisse DXCVI | Laisse DXCVII ► |
. . . . . . . . . . . . . . . . . . . . . . . . . . . . . . . . . .
La nuet sont a deport li dui pareil jeü.
Tost furent d’un amor ensanble revestu :
Cescuns autre desir qu’il eüsent ehu,
L’uns d’om, l’autre de fame, sunt au matin perdu.
Un amor, un voloir furent pués anbedu
E menerent teil vie qi molt pleisi Jexu.
Quant lo jor esclari, ou palés sunt venu
Soldan e son enfant et dan Roland lor dru,
Marcel le patriarch et Ugues le menbru.
Li prençes de Sorie e li quens e li du
Lor bon roi Anseïs ont entr’ eus receü :
E li e sa moiler amerent anbedu.
La sainte messe oïrent, qe chantee lor fu ;
Pués montent bacheler sor ces destrer crenu,
Qui ont por la cité boordés e ronpu ;
S’il i fu menestrer, si l’ont bien proveü.
Gariç ert Aquilant, q’avoit estés feru ;
Hue, le sir de Blois, l’en amaine aveq lu,
Si l’a feit batiçer ; le non n’i ont tolu.
Pués le dit : « Biau ami, alons devant celu
« Por qoi je ai passés deca le mer fondu ;
« Por lui ai refusee corone de or molu.
« Quan il avra de vos le gran bien entendu,
« Le sens e la proece e les autres vertu,
« O nos vos amenra dela le mer fondu,
« Si venirés en Françe, en le reigne asolu,
« Verés la flor des homes de bontei esleü ;
« Le quart de mon mennoir vos en sera rendu.
— Vostre mercé, bias sir », cil i a respondu ;
« Ja dou servis Rolant ne me verés moü :
« Se pur a serff me daigne, ja ne li demant plu. »