| ◄ Laisse DXCVIII | Laisse DXCIX | Laisse DC ► |
— Vestre preu, vestre honor », ce dit Rolant, « bias sir,
« E qant qui bon vos est m’acovient obeïr.
« Mais se vos lasserés vos fil o moi venir,
« Il n’avra mal sens moi, se l’en porai guenchir.
« S’il voudra mon segnor Carlon e moi seguir,
« Vos en porois por droit bone novele oïr,
« Se Diey, qi le puet fere, ni le veult contredir.
« Je vos lés Anseïs, qui mout a grant desir
« De vos e de vos homes honorer e servir ;
« E vos le devés bien come vos fil tenir
« E il vos come per amer e maintenir ;
« Espoir q’entre vos dous n’avra mester de mir.
« Une rien vos afi, ne le di por blandir :
« Se Damediey de glorie le daigne consantir,
« Que nos pusons d’Espaigne le roiame conquir,
« Asés tost me verés jusqu’a vos revenir,
« Si amenrai de gient aveq moi tel enpir
« Qui voldront Babilonie droit au mur asalir :
« Mar i poront Paien en grant repois dormir.
« Mai si vos voul en don et en grace querir
« Qu’en pes et an delit vos doivés contenir ;
« Fetes feir les eglexies e la loi Diey samplir. »
Respondi le Soldein con lermes e souspir :
« Je ferai volunter, se je puis, vos plesir.
« E quant voi que non doi mon enfant retenir,
« Je le vos recomand, ne vos en sai plus dir,
« Que vos en tel mainere le deiés semonir
« Qe il en face vos e mon cor esjoïr.