◄ Laisse DXC | Laisse DXCI | Laisse DXCII ► |
Le duc oi le chustume qu’en cel païs estoit
Et la vie des homes : sacés molt i desploit ;
Por ce non velt entrer ni aler in lor destroit,
Ainz fist sun tref destendre o le plus grant prés voit.
Cels de Sidoigne invoie ; il en vint grant esploit,
Ceschuns de flors de rouses plaine mains i portoit,
Estrimens avoient qe molt doulz tentisoit.
Sonant et charolant vinent au duc tot droit,
Pué li funt demander s’autre riens i plesoit,
Fors icel sacrefise que cescuns i fesoit ;
Ja ne lor voudra quere riens que ne li outroit,
Afors que porter armes, qe ja nuls ne l’avoit,
Ne ja un tot soulet dou païs non istroit.
Rolant oï qu’entr’ aus point d’armes n’i avoit ;
Lor panse en sun corage comant il le feroit.
Une si tres grant masse d’avoir lor a toloit
Dont sis mil chevalers uns ans l’en serviroit.
Chant l’avoir fu chargé, si s’en torne o il doit
Et laise cil ester au repous mallehoit.