| ◄ Laisse DIV | Laisse DV | Laisse DVI ► |
Mout fu joians Baudor deu baron amener ;
Mantinant commenda ses sarçan a entrer
La dedans le boscaje a grand açes d’acer :
De rames e de broches qe il lor a feit coubrer
Desor li dos batiaus fait bastir un soler,
Tant cum le bon cival poit a leisir ester ;
Roland l’en a cunduit por la rene d’or mer.
Quand tuit furent ensamble, si pristrent a sigler ;
La traverse asouaje e les tormant de mer.
Quan furent a la nef, si vont les pont geter ;
Por enging e por cordes ont mis li bon destrer
Sor la prime coverte o fu li dos saumer
Qe li dos merceant soloient civalcer :
Por ce i avoit asés de vaine e de torquer.
Les somer geterent ens la mer a floter.
Mout se paine Roland dou cival atorner,
Pois est monté sor li plus alt soler.
Le stormant le tenoit por le poing senestrer ;
Ses sarçant penerent dou baron honorer :
Iluec non fu serés nuls jentil salüer.
Li mestre lui osta ses verd heume d’acer
E li duc le servi de tot son demander.
Ja ert la nuit obscure, mais il font alumer
Dos cires colibeus por lui plus honorer.
Entor lui s’arotent. Unques plus voluntier
N’aconte veuve dame nul prodon estancher
Quand il demaine ce qe li feit mestier.
« Sire », dist le stormant, « or venés, qe monstrer
« Vos voil ce qe conquis avés de dos liçer. »
Li duc respond cun un visaire cler,
Tot en riand : « Laxei le ore ester,
« E parlerons un petit dou mangier,
« Car non hui mie gran leisir, ne hoi ni er. »
Lor veïsés entor lui demener
Cels galiot e le dois aprester.