◄ Laisse DLXXXV | Laisse DLXXXVI | Laisse DLXXXVII ► |
A l’ains qu’il poit le roi a fait ses brief escrir
Et les fait aporter de par tot sun inpir
A rois et amirans, si lor a fait sentir
Que dou comant Lioné non doüsent pertir,
Mais lui et sun enfant lor comande obeïr.
Pué fist de le citez cent des milor eslir,
Lors le comande tost au matinet garnir
Par li dos convoier, honorer et servir.
Cel jor mostrent grant joie e le soir vont dormir
Bien por maitin se funt et chaucer et vestir,
Et funt de beaus ernois carcer muls et garnir.
Dou roi ont pris cungié, uns graile funt bondir
A tot le petit pas vont de le ville insir.
Cel jor cevaucerent droitement a Monmir,
La plus noble citez que Soudan doit tenir.
Encuntre lor vinent et li bons et li pir :
De veoir l’ome estrange tuit sunt plus en desir,
Que avoit l’orguelos Pellias fait morir,
Que ne sont de Sanson, qe fils estoit lor sir.